Inaaprobaran kan Committee on Infrastructure kan Barangay Mabolo sa syudad nin Naga an implementasyon kan manlaen-laen na proyekto sa imprastraktura na may katuyuhan na mapakarhay an kamugtakan kan pagbuhay kan mga residentes. Segun sa liderato kan barangay, parte ini kan padagos na paghihingowa na masimbagan an mga pangenot na pangangaipo kan komunidad, orog na sa lado nin kaligtasan asin kaginhawahan.
Segun ki Barangay Kagawad Glen Fransisco, Chairperson kan Committee on Infrastructure, pigpapadagos na ngunyan an canopy project kan barangay. Paliwanag pa kaini na an katuyohan kaini na matawan nin magkakanigong lindong an mga residente, orog na sa mga aktibidad o pagtiripon-tipon sa laog kan barangay.
Idinagdag pa ni Fransisco na piglalaoman na makakatabang an proyekto na magin mas organisado asin komportable an mga programa asin serbisyo sa komunidad. Hinihinguwa man kan barangay na maseguro na an kada proyektong iimplementar direktang mapapakinabangan kan mga namamanwaan.
Mientrastanto, padagos man an bidding para sa konstruksyon kan Materials Recovery Facility (MRF) asin drainage system sa duwang zona kan barangay. Segun sa opisyal, tatawan nin prayoridad an mga nasabing lugar huli ta ini an pigkokonsiderar na pinaka-kritikal sa panahon nin tig-uran, kun saen parating naeeksperyensyahan an pagbaha asin iba pang kaugnay na problema.
