Nagpatanid an Department of Agriculture (DA) sa posibleng paglangkaw kan presyo kan bagas asin iba pang mga pangenot na kakanon sa Agosto, sa ibong kan pag-asegurar sa nasyon na magkakaigwa nin supisyenteng supply sa mga masunod na bulan.
Susog ki Agriculture Secretary Francisco Tiu Laurel Jr., an nagdadangadang na paglangkaw kan presyo sarong direktang resulta kan padagos na paglangkaw kan presyo kan lana sa merkado global, na pinalala kan mga tensyon sa Middle East.
Pig-eksplikar kan sekretarya na dae malilikayan an paglangkaw kan presyo kun madagos pa an krisis. Ini nin huli ta an gastos sa abono, transportasyon, asin lohistika na papasanon kan sektor nin agrikultura awtomatiko man na malangkaw.
Sa ibong kan patanid na ini sa presyo, piglinaw kan DA na mantenidong stable an kabilogan na supply kan bagas sa merkado.
An National Food Authority (NFA) igwa man nin supisyenteng buffer stock enkaso kaipuhan.
Mientrastanto, bilang lakdang tanganing maibsan an gabat kan naglalangkaw na gastos sa produksyon, inasegurar kan gobyerno na padagos an pagdistribuer nin subsidiya o financial assistance para sa mga apektadong paraoma asin parasira.
