Pigbombo kan Israel an central district kan Beirut, Lebanon kasubanggi na nagresulta sa pagkagadan kan 6 katawo. Apuwera sa mga nagadan, an mga Lebanese health officials nagbareta man na 7 katawo an nairido sa pag’atake.
Susog sa Israel, nagsagibo sinda nin precise air strike sa kabisera kan Lebanon asin pigpuntirya an sarong edipisyo sa distrito nin Bachoura harani sa parlamento.
Ini an pinakaharaning tinamaan kan sarong air strike kan Israel sa central downtown district kan Beirut.
Tolong misil an nagtama man sa southern suburb kan Dahiyeh, na nagseserbi kuta kan Hezbollah sa Sur Beirut, kun saen nagadan an lider kan Hezbollah na si Hassan Nasrallah kan nakaaging semana asin nagkaigwa man nin makosog na mga pagsabog.
Sa katimugang parte kan Lebanon, an militar kan Israel nagpatanid kan Huwebes nin pagkaaga na an saindang air strikes an magpapadagos.
Magigirumdoman na pigpoonan kan Israel an ground invasion sa southern Lebanon ngonian na semana asin pigkumpirmar kan sarong aldaw na 8 sa saindang mga soldados an nagadan sa laog kan Lebanon. An ground invasion asin air strike kan Israel sa Lebanon an kasunod kan pagpapakawala kan Iran nin sandamakmak na missiles sa Israel komo pagbalos sa air strikes kan Israel sa southern suburbs na naggadan man sa lider kan militanteng Hezbollah.
