Nangapudan an mga jeepney driver asin ride-hailing app drivers sa gobyerno na aprubaran na an saindang hirit na fare hike increase komo kasimbagan sa padagos na pag-sipa kan presyo nin produktong petrolyo.
Sigun ki Boy Vargas, presidente kan Alliance of Transport Operators and Drivers Association of the Philippines (ALTODAP), haloy nang naghahalat an mga jeepney driver sa simbag kan gobyerno sa saindang petisyon para sa provisional fare increase na pigsunad tulong taon na ang nakalihis.
Bagaman naglalaom sindang mareresiber an P1 dagdag-pasahe, naghahadit sinda na dae ini maaprubaran.
Sinugundahan man ini kan Transport Network Vehicle Services (TNVS), na nagsabing hagad ninda an fare hike magpuon pa kan nakalihis na taong 2023, alagad dae pa man ini naaprubaran.
An fuel subsidy an paramientras solusyon sana kaya sa padagos na paglangkaw kan presyo nin gasolina. Marurumduman na an gobyerno an nagtagama kan P2.5 billion para sa fuel subsidy sa irarom kan 2025 national budget tangani matabangan an mga public utility drivers, paraoma, asin parasisira.
Alagad sigun ki Presidente Ferdinand Marcos Jr., dae pa kinakaipuhan an fuel subsidy nin huli ta nagbaba na an presyo kan langis kasunod kan ceasefire sa pag-ultanan kan Israel asin Iran
