Inapod kan Chinese government komo “infringement of territorial sovereignty” an anom na aldaw na misyon kan Atin Ito sa West Philippine Sea, na kinababalihan kan “patriotic jetski flag ride” asin pagpatindog nin bandera kan Pilipinas sa lugar.
Segun ki Chinese Embassy Deputy Spokesperson Guo Wei, an Tiexian Jiao na inaapod nindang Pag-asa Cay 2 parte kan Nansha Islands kan China asin sarong bakanteng bahura na mayong nakaistar.
Mientrastanto, isinagibo kan Atin Ito coalition—na binilog nin mga volunteers, parasira, artista, asin reporters—an saindang ikaapat na civilian mission na inapod man na “Balik-Pag-asa.”
Komo parte kan misyon, si Akbayan Party-list Rep. Dadah Kiram Ismula nag-jetski asin napatindog nin bandera kan Pilipinas sa Pag-asa Island Cay 2 tanganing tawan doon an sovereign rights kan nasyon sa pinag-aagawan na teritoryo.
Pinaneinotan ini ni Atin Ito co-convenor asin mission commander Rafaela “Paeng” David asin pinartisiparan nin haros 180 katao na sakay kan barko asin support vessel na ML Chowee. Ipigkundusir an biyahe poon Abril 30 sagkod Mayo 5.
Segun sa mga organizer, igwa man ini nin political message na nagtutukoy sa dai nautob na promesa ni dating Pangulong Rodrigo Duterte na mag-jetski sa West Philippine Sea tanganing tawan doon an karapatan kan nasyon.
Segun sa Atin Ito, obheto kan misyon na mas mapakusog pa an presensya kan mga sibilyan sa West Philippine Sea bilang parte kan saindang mga nainot ng mga aktibidad sa lugar.
