Nakisumaro an Julian B. Meliton Elementary School sa selebrasyon kan National School Safety Week na nagpoon kan Oktubre 12 asin matatapos sa Oktubre 16, 2026, susog sa direktiba kan Department of Education o DepEd.
Sa entrevista kan Bombo Radyo Naga ki Apollo Sebello – Principal 1, Julian B. Meliton Elementary School, sinabi kaini na pinangenotan kan eskwelahan an paglansar kan programa sa paagi nin sarong seremonya nin bandera kan Lunes, na inatenderan kan mga representante kan eskwelahan, mga magurang, asin mga opisyales kan pulis.
Segun ki Sebello, nagkondusir sinda nin orientation tanganing tukduan an mga estudyante kan tamang kaligtasan sa laog asin luwas kan eskwelahan—puon sa pagluwas sa harong, paglaog sa eskwelahan asin klasrum, sagkod sa pag-uli na ligtas.
Bilang parte kan seguridad, an eskwelahan nagkokondukta man nin mga inspeksyon sa lugar, naggagamit nin mga metal detector sa entrada, asin nag-iimplementar nin picture identification para sa mga magurang asin iba pang mga bisita. Kinakaipuhan man na isurat kan mga bisita an saindang mga pangaran sa sarong logbook tanganing mabantayan an saindang paglaog sa eskwelahan.
Pigtawan-duon man ni Sevilio an importanteng papel kan mga opisyales kan barangay, asosasyon nin magurang asin paratukdo, asin kapulisan sa pagmantenir kan kaayusan asin kaligtasan kan mga estudyante.
Mientrastanto, kasabay kan selebrasyon, pigtutulod man kan eskwelahan an mental health awareness sa paagi nin mga orientation, seminar, readings, asin programa sa isports tangarig na ma-engganyar an mga estudyante na magpartisipar sa mga makahulugan na aktibidad asin mabawasan an labi-labing paggamit nin gadgets.
Segun pa ki Sebello an kaligtasan kan mga kaakian bako sana responsibilidad kan mga paratukdo asin staff kan eskwelahan, kundi shared duty kan bilog na komunidad.
An gabos pig-eenkaminar na magkooperar sa pagmantenir nin ligtas, areglado, asin inklusibong kapalibutan para sa lambang estudyante.
