Naghiras an sarong propesor kan importansya kan financial literacy o tamang money management tanganing matukduan an publiko sa tamang pagmanehar kansaindang kwarta.
Sa intrevista kan Bombo Radyo Naga ki Dr. Rina Abner-Puerta, Associate Professor II, College Of Business Management, Partido State University, sinabi kaini na an financial literacy kan sarong tawo dai nasusukol sa kantidad kan kita o kwarta, kundi sa saindang kakayahan na magin wais sa paggamit asin responsableng mga desisyon sa paggastos, pag-ipon, pagpuhunan, asin pag-utang.
Pigduon man ni Abner-Puerta an importansya kan pagkakaigwa nin financial discipline, urog na sa pagbudget asin pagkontrol kan gastos. Sinabi niya na igwang mga tawo na dakula an kita alagad nauubusan man giraray nin kwarta huli sa sobrang paggastos asin kawaran nin tamang pagplano sa saindang mga gastos.
Nag-abiso man ini na importanteng magtagama nin porsyon kan saindang kita para sa savings antes maggastos sa ibang pangangaipo. Inenkaminar man kaini an mga nagkukuarta nin minimum wage na maghanap nin dagdag na kita kun posible, kaiba an maingat na pagbadyet asin kooperasyon kan pamilya.
Mientrastanto, ipinagirumdom man kaini an kahalagahan kan sarong emergency fund tanganing mabayadan an mga dae piglalaoman na gastos, partikularmente an biglaan na mga pangangaipong medikal.
Nagpatanid man an eksperto kontra sa reckless borrowing, urog na sa credit cards asin online lending applications na posibleng magresulta sa mas magabat na obligasyon pinansyal huli sa interes asin iba pang babayaran. Hinagad niya sa publiko na maingat na siyasaton an saindang kakayahan na magbayad asin magin mapagduda sa mga alok na pautang asin pamumuhunan na nanunuga nin marikas asin dakulang ganansya.
Pigpagirumdom man an apat na importanteng lakdang sa marahay na pamamahala nin kwarta: pagbantay sa mga gastos, pagigin maingat sa pag-utang, regular na pagtipon, asin madunong na pamumuhunan susog sa saindang kakayahan asin lebel nin peligro. An Finalcial Literacy an mahalagang marhay tanganing makatabang na maibitaran an pag-utang.
