Pahingalo liwat si Kai Sotto makalihis an ankle injury na sinapo kaini sa saiyang comeback game sa Japan B. League kan nakalihis na Sabado.
Nakabweltada na sa aksiyon an 7-foot-3 Pinoy cager alagad minalas ini sa laban kan saiyang tropang Kashigaya Alphas kontra sa Ibaraki Robots.
Nagsapo si Sotto nin ankle injury sa thirs quarter kan laban rason tanganing dae na ini makabweltada pa sa kawat.
Alagad mayong dapat ikahadit huli ta minor injury sana an sinapo ni Sotto.
Liwat na makakahampang kan Alphas an Robots kan nakalihis na semana.
Mayo pang opisyal na statement an Alphas sa estado kan injury ni Sotto.
Posibleng kaipuhan sana ini nin pahingalo tanganing marekas an pagrahay kan saiyang injury.
Marurumduman na sarong taon man na dae nakakawar si Sotto makalihis na magsapo nin ACL injury kan nakalihis na taon.
Makalihis an halabang pahingalo, nakabweltada ma sa pagkakawat si Sotto sa B. League tanganing tabangan an Alphas sa kampanya kaini.
Magayon na bareta ini para sa Alphas siring man sa Gilas Pilipinas na masabak sa pirang darakulang torneo sa taong ini.
Enot na an second window kan FIBA World Cup Asian Qualifiers sa Pebrero. Makakalaban kan Gilas Pilipinas an Australia asin New Zealand sa nasambitan ng window.
