Pighihinguha kan lokal na gobierno kan Gainza, na makapagtao nin malinig na inumong tubig sa banwaan katakod kan naeeksperyensiyahan na kakulangan nin suplay sa pirang barangay.
Sa entrevista kan Bombo Radyo Naga ki Glenn Gontang, Mayor-elect kan Gainza, Camarines Sur, sinaysay kaini na kan mga nakalihis pa na aldaw, naeeksperyensiyahan na talaga an kakulangan nin suplay kan tubig-inumon.
Huli digdi, igwa soboot nin pigpadara an LGU nin lorry truck asin nag-arkila nin mga pribadong lorry truck tanganing magsuplay sa mga lugar na pigkukulang kan tubig.
Huli man sa nasambitan ng huma, pighuhurot kan MNWD na magkaigwa nin pumping station sa banwaan, kun kaya an LGU an nakabakal naman nin lote na bubugtakan kaini.
Mientrastanto, kan nakalihis soboot nataon, sa pigsagibong testing kan pigpatugdok na pumping station, nagluwas na maaskad an tubig na nagluluwas sa lugar.
Katakod kaini, pighagadan soboot sinda kan MNWD nin aparato o treatment na makakatabang tanganing masierto na malinig an tubig, alagad nagkakantidad soboot ini nin P25-M na dae kayang budgetan kan lokal na gobierno orog na ta limitado man sana an saindang budget.
Katakod pa kaini, pigheras man kan pirang residente sa Sitio Dahik, Brgy. Malbong, sa nasambitan ng banwaan na an mga lorry truck gikan sa LGU an dae nakakalaog sa saindang lugar nin huli ta raot an tinampo.
Apwera pa digdi, sarong bes sa sarong semana man sana soboot naglalaog an lorry truck. Huli digdi, pangapodan ninda na maresolbaran an siring na problema orog na ta nagbabayad man sinda kada bulan.
