Maduon na kinontra kan Kamara an nagin pahayag ni Vice President Sara Duterte na nakabase sa tsismis an kasong pigkakahampang kan saiyang ama na si dating Presidente Rodrigo Roa Duterte.
Sigun ki House spokesperson Atty. Princess Abante an kasong pigkakahampang kan dating Presidente sa International Criminal Court (ICC) an nakabase sa matitibay na ebidensiya asin mga sinumpaang salaysay kan mga saksi.
Pigtawan-duon ni Abante na an kaso sa ICC an naka-ugat sa sarong internasyonal na legal na proseso na pigsusuportaran nin dokumentaryong ebidensya asin testimonya kan mga biktima, bako sa sabi-sabi o ribok sa pulitika.
Naihapot man ki Abante an reaksiyon kaini sa pangapodan kan Bise Presidente na ibasura kan ICC an kaso asin pabayaan na an mga Pilipino an magdesisyon sa kapalaran kan dating Presidente na nahahampang sa kasong crimes against humanity kan madugong kampanya kontro droga kan saiyang administrasyon.
Piglinaw kaini na mayong kinaaraman an House sa mga pagdangog kan ICC asin nagtitinir ining suhay asin independiyente gikan sa international court.
Presenteng nakakulong si dating Presidente Duterte asin naghahalat kan paglilitis sa ICC huli sa soboot extrajudicial killings na nangyari kan saiyang panunungkulan.
Alagad maski nag-atras na an Pilipinas gikan sa Rome Statue kan taong-2019, nagtitinir an hurisdiksiyon kan ICC sa mga krimeng naganap mantang miyembro pa an nasyon kan nasambitan ng tratado.
