NAGA CITY – Kampante an kampo ni Camarines Norte Governor Edgardo Tallado na dae pa tapos an laban kan opisyal makalihis ikanselar kan Comelec 1st Division an kandidatura kaini sa gubernatorial race.
Sa entrevista kan Bombo Radyo Naga ki Sherwin Mata, tagapagtaram ni Tallado, sinaysay kaini na kasuudma kan magsunad sinda nin motion for reconsideration sa Comelec en banc.
Sigon ki Mata, harayo pa an pag-aagihang proseso kan kaso kunsaen pwede pa ining maka-abot sa Court of Appeals asin Korte Suprema.
Marurumduman na kinanselar kan Commission on Election (Comelec) 1st Division an kandidatura ni Tallado makalihis paburan an petisyon na pigsunad kan Volunteers Against Crime and Corruption asin kan sarong alkalde sa nasambitan ng probinsya.
Kinwestyon kaya kan grupo an pagsunad pa nin kandidatura kan gobernador sa ibong kan pagsirbi na kaini nin tolong termino.
Enot digdi, haros magkakasunod na nahampang sa suspensiyon asin dismissal si Tallado huli sa mga kinakahampang na kaso.
