Nagsunad nin notice of appeal an kampo ni dating Presidente Rodrigo Duterte sa Appeals Chamber kan International Criminal Court (ICC) tanganing baliktadon an desisyon kan Appeals Chamber na i-reject an interim release o paramientras na pagpapalibre sa dating Presidente.
Sa anom na dahing dokumento na igwang petsang Enero 28 na isinumiter kan kampo ni Duterte, pighagad ninda an tulos kaining paramientras na paglaya, sa irarom kan mga kondisyong pwedeng ipautob kan sarong party kan international court.
Hurot kan kampo kan dating Presidente na napasala soboot an Pre-Trial Chamber I dapit da dae kaini pagsaalang-alang sa medical report na saindang isinumiter.
Sigun pa sa sainda, malinaw soboot na nakasaysay sa medical report an padagos na paglala kan salud asin pagluya kan cognitive condition kan dating Presidente.
Sinabi pa kan kampo ni Duterter na obligasyon kan Pre-Trial Chamber na ikonsiderar an nasambitan ng report na pagsusuri kaini kun kinakaipuhan pa an padagos na pagkakaditene ni Duterte sa The Hague.
Marurumduman na kan nakalihis na Enero 26, nagdesisyon an Pre-Trial Chamber i na igwang bastanteng basehan na pwede pa man na makagibo si Duterte nin mga krimeng sakop kan hurisdiksiyon kan ICC.
Sa parehong aldaw, pigkonsiderar kan chamber na igwang kakayanan si Duterte na magpartisipar sa mga pre-trial proceedings katakod kan kasong crimes against humanity na pigkokonektar sa mga paggadan kan ribu-ribong Pinoy huli sa saiyang kampanya kontra sa iligal na droga kan ini alkalde kan Davao City asin Presidente kan Pilipinas.
Sinayumahan man kan ICC an hagad ni Duterte para sa indefinite adjournment.
Mientrastanto, ipigtalaan kan korte an pagpuon kan confirmation of charges hearing ni Duterte sa Pebrero 23, 2026.
