NAGA CITY- Saro sa mga gagamitong depensa kan kampo ninda Sen. Antonio Trillanes IV sa pagdangog kan Makati RTC Branch 148 an kumpirmasyon ni Armed Forces of the Philippines (AFP) Chief of Staff Gen. Carlito Galvez Jr. na nag-apply an opisyal kan saiyang amnesty.
Sa paghampang ni dating Solicitor General Florin Hilbay sa mga kagawad kan media sa saiyang pagbisita sa Naga City, sinaysay kaini na huli sa pahayag ni Galvez, mayo ng kwestyon pa kun kinakaipuhan na magpaluwas an korte nin warrant of arrest sa kasong kudeta laban sa opisyal.
Komo saro sa mga legal counsel ni Trillanes, sinaysay ni Hilbay na dapat na kampihan kan korte an kumpirmasyon ni Galvez huli ta an AFP an nagtitindog na custodian kan mga amnesty application asin pigtuga nindang kasalan ninda an pagkawara kan kopya kan aplikasyon kan lehislador.
Gamit man suboot an nasambitang pahayag ni Galvez, pupurbaran kan kampo ni Trillanes na ipakanselar an bail kaini sa kasong rebelyon sa Makati RTC Branch 150 makalihis na magpaluwas ini nin warrant of arrest kan nakaaging semana.
Mientrastanto, sigon sa dating Solicitor General, huli sa kumpirmasyon kan AFP Chief of Staff, garu napilayan kaini an factual basis kan Proclamation No. 572 ni Presidente Rodrigo Duterte na nagpapawarang bisa sa amnesty ni Trillanes.
Maninigo man suboot na omawon an AFP sa pagigin honesto asin sa professionalism kaini sa ibong kan purbar na paggamit sa sainda sa pamumulitika.
