Pigpaliwanag kan Barangay Kapitan kan Tabuco, Naga City an rason sa paramientras na pagsarado kan esplanade.
Sa entrevista kan Bombo Radyo Naga ki Elisa Carmona,Barangay Kapitan kan Tabuco, Naga City, sinaysay kaini na hinagad kan mga opisyales kan vendor association sa Esplanade an temporaryong pagsarado kaini tanganing matawan nin kasimabagan an mga kariribukan na nangyayari sa lugar.
Sigun ki Carmona, huli soboot sa pwesto nagkaigwa nin dae pagkakairintindihan sa area nin huli ta igwang mga vendor an nakikisuso pa sa lugar maski igwa naman nin pwesto sa ibang area.
Huli kaini, tanganing magkaigwa nin mas konkretong lakdang nagdulok na an Kapitan ki Naga City Mayor Leni Robredo.
Katakod digde, nagkaigwa nin pag-urulay an nasambitan ng opisyal kaibahan an pamayo kan MEPO, PSO asin an alkalde kan siyudad nin Naga.
Digde nabilog an sarong kasuguan na dapat igwang polisiya na pigsusunod an mga paratienda na gikan sa MEPO siring na sana kan tamang sukol kan stall, pagmantinir kan kalinigan asin iba pa.
Importante soboot ini tanganing mas magin malinaw sa gabos na mawot magtinda sa lugar an saindang mga responsabilidad.
Mientrastanto, pig-asegurar man ni Carmona na liwat na mabubukasan an esplanade sa oras na magin marhay na an pag-urulay dapit digde.
Sa ngunyan, hagad na sana kaini an kooperasyon asin pag-intidi orog na kan mga vendors tanganing mas magin marhay an saindang kamugtakan sa lugar.
