Nagpagirumdom an Gobyerno kan Barangay kan Concepcion Pequeña sa mga residente na magkooperar sa pag-implementar kan mga lakdang laban sa dengue kasunod kan mga naikurit na kaso sa saindang lugar.
Sa intrevista kan Bombo Radyo Naga ki Juan Francis Mendoza, Barangay Kapitan kan Concepcion Pequeña, sinabi kaini na importante na papagdanayon na malinig an kapalibutan ngani na maibitaran an pagdakul kan mga namok na nagdadara kan helang.
Sinabi pa ni Mendoza na nakabakal na nin apat na misting machine an barangay na ilalaag sa manlaen-laen na parte kan Concepcion Pequeña bilang parte kan mosquito control operations. Piglinaw man kaini na mayo pa sindang nareresibeng report na nagadan huli sa dengue sa saindang barangay.
Inenkaminar kan barangay an mga residente na regular na maglinig kan saindang palibot asin haleon an mga posibleng pag-ataman nin lamok, arog kan mga bote, lumang goma, asin iba pang lalagan na may natipon na tubig. Tinawan man nin duon an importansya kan tamang pag-apon kan basura tanganing maibitaran an pagdakol kan mga breeding sites kan lamok.
Segun ki Mendoza, dakula an maitatabang kan kooperasyon kan lambang residente sa paglikay sa paglakop kan helang na dengue. Nangapudan ini sa publiko na magin vigilante asin magsunod sa mga barangay reminders para maprotehiran an saindang mga pamilya asin komunidad laban sa helang.
