NAGA CITY- Pigpaplano kan National Telecommunications Commission (NTC) an pagpapa-amyendar sa SIM Registration Act sa paagi kan face-to-face registration tanganing maulangan an mga scammers.
Marurumduman, pigpalagan ini kan telecommunication companies alagad enot nang pigsaysay kan NTC sa mga telco players na kaipuhan mas orog pang pamarhayon an sistema sa SIM card registration.
Sigun ki Pinky Nepomuceno, pamayo kan Department of Information and Communications Technology sa probinsiya nin Camarines Sur, pabor sinda sa planong ini kan NTC orog na ta igwang mga nakakalusot na namemeke kan pagkakabistuhan asin ginagamit an simcard sa pangbibiktima.
Dugang pa kan opisyal, mas magayon na enkaso magbakal nin sim card an sarong indibidwal diretso na ini sa pagpaparehistro sa tabang kan mga nasa tindahan kan simcard. Apwera digde, kaipuhan man na igwang mag che-check kan ID na gamit kan sarong tawo.
Pigsierto man kan DICT na preparado sindang magtabang orog na ta igwang dating Sim Registration Booth na ginamit sa implementasyon kan programa sa nakalihis na taon.
Mientrastanto, igwa pa man nin mga nagkukuriyat na text message na an katuyuhan sana an mang-scam nin iba alagad padikit-dikit naman soboot na nakakanood digde an mga Pilipino.
Sa ngunyan, hagad na sana kan opisyal na padagos na magin matalino an publiko tanganing dae mabiktima .
