NAGA CITY – Ikokondusir na sa Hunyo 18, 2024 an kasalang bayan sa banwaan kan San Jose, Partido sa probinsiya kan Camarines Sur.
Sa entrevista kan Bombo Radyo Naga ki San Jose Mayor Jerold Peña, sinaysay kaini na an nasambitan ng aktibidad an papartisiparan kan 11 couples na nakapasar sa requirements kan simbahan.
Katakod kaini, sigun sa alkalde naiiba an kasalang bayan ngunyan na papaabutong Hunyo 18 nin huli ta mismong padi an makasal sa nasambitan ng 11 pades kan magpartner.
Dugang pa ni Peña an gabos na requirements sa kasal an pigsimbag kan LGU-San Jose puon sa dokumentos na kaipuhan asin magin sa pigsagibong prenup shoot. Apwera pa kaini, igwa man tinaong bagas, limang kilo kan karneng manok asin limang kilo kan karneng orig.
An mga nasambitan ng regalo pigtao antes pa an mismong kasalang bayan tanganing magamit komo pagkakan sa mismong aldaw kan saindang kasal. Pigtawan duon kan opisyal na obheto kan aktibidad na ini an magin memorable an saro sa pinaka-importanteng aldaw para sa magpartner asin magin legal na an saindang pag-iibahan.
Sa ngunyan, hagad na sana kaini an marhay na pag-iibahan para sa mga ikakasal sa maabot na Hunyo 18 sa saindang banwaan.
