NAGA CITY – Prayoridad ngunyan kan Department of Education (DepEd)-Bicol an kasalbaduhan kan mga atleta asin coaches para sa Palarong Bicol 2024.
Sa entrevista kan Bombo Radyo Naga ki Gilbert Sadsad, Regional Director kan Department of Education-Bicol, sinaysay kaini na maski gurano kapreparado an sarong lugar sa dakulang okasyon, maski sa nasyonal na lebel, pirming nagkakaigwa nin problema sa tahaw o makalihis an sarong event.
Dugang pa kan opisyal, na common knowledge na maluya an supply kan tubig sa siyudad nin Legazpi alagad pighihirahay naman soboot an mga linya nin tubig sa mga ginagamit na pasilidad.
Dugang pa kaini, kakaulayon naman ninda an lokal na gobyerno kan Legazpi kun posible na pirming nakapreparar an mga fire trucks sa lugar na mag-distribwer sa billeting quarters komo suporta sa distribusyon nin tubig.
Sigun pa ki Sadsad an seguridad asin kasalbaduhan kan mga atleta, coaches, asin iba pang mga opisyal an permi nindang pig-iisip kada igwang dakulang pangyayari, asin pirme nindang mawot na i-asigurar.
Nakikipagkoordinar naman an DepEd sa kapulisan tanganing masierto an kasalbaduhan asin seguridad kan lambang delegado sa nasambitan ng torneyo.
Pig-ako man kan opisyal na igwa nin mga naiirehistrong isolated cases kan panghahabon sa mga siring na event, orog na ta marekas sanang nakukua an ibang gamit orog na kun nawawalat kan mga estudyante o coaches.
Dugang pa kaini, dai malilikayan an panghahabon, nagsasagibo sinda nin maninigong counter measure, nakikipag koordinasyon naman soboot sila sa PNP asin sa mga opisyal kan barangay tanganing matawanan nin seguridad an mga ma-partisipar.
