Kasabay kan pagselebrar kan World Tuberculosis Day, nagpahayag nin kahaditan an Department of Health (DOH) sa padagos na paglangkaw na kaso kan TB sa nasyon asin man pigtawan duon an pangangaipuhan nin mas matibay na lakdang sa paglilikay, amay na pagka aram asin man pagbubulong.
Sa paglunsar kan The Medical City Integrated Delivery of TB Services (IDOTS) center, sinabi ni Health Secretary Ted Herbosa na bagaman posibleng likayan asin man bulungon an helang, nagtitinir ini na dakulang huma sa pampublikong salud.
Basado sa World Health Organization Global Tuberculosis Report 2024, an Pilipinas an kabali sa limang nasyon na igwa nin pinakahalangkaw na kaso kan TB sa kinaban, kabali na an India, Indonesia, China, asin man Pakistan.
Pig konsiderar ni DOH Undersecretary Maria Rosario Vergeire na labing nakakahadit an nasambitan ng datos, kun saen naglangkaw nin 46% an mga pagkagadan na igwa nin koneksyon sa TB gikan 2015 hasta 2022.
Apektado an manlaen-laeng pangkat kan edad: 7% iyo an mga aking 0-14 anyos, 61% an kalalakihan na 15 anyos pataas, asin man 32% an mga kababaihan sa parehong edad. Pigtawan duon ni Herbosa na an pagbaba kan TB mortality sa zero pag abot kan 2028 an saro sa pangenot na prayoridad kan DOH.
Tangani makamit ini, kinakaipuhan an mas epektibong pagtuklas, mas mahusay na pagbubulong, pagsunod kan mga pasyente, asin man digital monitoring tools tangani subaybayan an sitwasyon kan TB sa nasyon.
