Nagtutubod an Department of Justice na mapapakusog an kasong pigpreparar katakod sa pagkawara kan mga sabungero sa oras na magluwas an panibagong mga resulta kan DNA testing.
Nagtutubod an nasambitan ng kagawaran na kun makumpirmar na an mga narekober na lawas sa Taal lake an tulang kan mga nawawarang sabungero, makakatabang soboot ini sa pigsunad na reklamo.
Sigun ki Justice Assistant Secretary Mico Clavano, an pagtugma o pag-match kan mga tulang na narekober sa mga sabungero an may epekto sa gabat kan kaso.
Sa sarong murder case, an pagpresenta sa lawas kan biktima an makapagpapatunay sa naganap na krimen o mismong pagkagadan kan mga ini.
Mantang sinabi man ni Justice Secretary Jesus Crispin Remulla na katabang asin man kaiba man an National Bureau of Investigation sa pagsusuri kan mga lawas na narekober sa lawa.
Saya ining nilinaw kasunod kan paghagad man nin tabang sa University of the Philippines asin nasyong Japan sa pagsasagibo nin DNA testing.
Marurumduman na nagsunad kansuarin sana an kaparientes kan mga nawawarang sabungero nin reklamo sa tanggapan kan Department of Justice.
Kun saen sinda nagsunad nin reklamong murder asin serious illegal detention complaint kontra sa soboot mastermind asin iba pang mga imbwelto sa pagkawara kan mga sabungero.
Sa presente, nagsasairarom na ini sa ‘evaluation’ kan prosekusyon kan kagawaran tangani makumpirmar kun igwa nin bastante ining basehan tangani magtindog komo kaso.
