Mainit pa soboot an palad ni UAAP two-time Most Valuable Player Kevin Quiambao makalihis na bumanat nin 26 puntos sa Korean Basketball League (KBL).
Iniluwas ni Quiambao an mala-MVP performance kaini makalihis na magpasabog nin anom na three-points mantang humatak ini nin 18 rebounds, tulong assists asin man sarong steal.
Alagad dae pa man ini bastante tangani sana madara sa pagkatrayumpo an Goyang Sono Skygunners na nagyuko sa Seoul Samsung Thunders sa iskor na 63-77 sa kawat na pigkundisir sa Jamsil Indoor Gymnasium.
Matikas an pigkakawat ni Quiambao na nagkurit nin career-high 36 points sa saindang 86-82 trayumpo laban sa Wonju DB Promy kan nakalihis na semana. Nakalugmok an Skygunners sa irarom kan standings na may 11-25 rekord.
Namati man an kusog ni dating College of Saint Benilde standout Justin Gutang na nagsumiter nin 10 puntos, siyam na assists, apat na rebounds asin tulong steals para sa Daegu na nagbusol sa 20-16 karta. Nag angat sa 12-24 an Thunders.
Sa ibong man na banda, nagtayumpo man an tropa ni SJ Belangel na Daegu KOGAS Pegasus kontra sa Ulsan Hyundai Mobis Phoebus sa iskor na 94-85 sa kawat na pigkundisir man sa Ulsan Dongcheon Gymnasium.
Nagkurit sana nin duwang puntos asin duwang assists si Migs Oczon para sa Ulsan.
