Pinalagan ni PPP Partylist Rep. Harold Duterte, pinsan ni Vice President Sara Duterte, an kapwa kaini lehislador huli man sa pambubully soboot sa Bise Presidente makalihis na tapyasan an propwestong pondo para sa 2026 kan Office of the Vice President (OVP).
Sa sarong statement ngunyan na Sabado, Oktubre 11, sinaysay ni Rep. Duterte na bagaman makadismaya, nilalaoman na soboot ninda an nagin aksiyon kan Kamara.
Inapod man ini kan lehislador komo “bullying” na nagkukubli komo governance asin bako sarong “budgeting”.
Sinaysay pa kan lehislador na bagaman binawasan an pondo kan OVP, dae kaini mapapauntok an kamawotan kan Bise Presidente na magsirbi.
Kada piso kaya na ibinawas gikan sa OVP an nagsisiwalat sana kun gurano man kakitid mag-isip asin nagin “politically vindictive” an nagkapirang mga inaapod na lehislador.
Sarkastiko man na binati kan lehislador an mga kaibahan kaini sa Kamara sa saindang nagin aksiyon.
Kun an intensiyon an tangani man magpasupog, binati kaini asin man sinabing pinapasupog sana ninda an saindang sadiri.
Hurot pa kan lehislador na mayong makakapugol sa OVP gikan sa pagsisirbi kaini sa mga Pilipino, na nakamasid asin iyong nakahiling kun sisay an nagtratrabaho para sa sainda.
Marurumduman, kan nakalihis na Biyernes, tinapyasan kan Kamara an propwestong pondo kan opisina ni VP Sara nin P156-million.
Kaya man gikan sa P889.2 million nagbaba na ini sa P733.2 million makalihis na dae liwat na sumipot an Bise Presidente sa pagdangog kan plenaryo tangani man depensaran kuta an proposed budget.
