NAGA CITY- All system go na an ikukundusir na koronasyon kan Miss Bicolandia 2024 sa aga, Setyembre 11, 2024 alas 7 nin pagkabangi sa JMR Coliseum.
Sa entrevista kan Bombo Radyo Naga ki Dr. Sonny Rañola, Naga City Councilor, sinaysay kaini na maarabutan na atyan o sa agang amay an mga bisita siring na sana kan mga ma-host sa nasambitan ng event na sinda Matteo Guidicille asin Rabiya Mateo asin kadakol pang artista.
Sigun pa ki Rañola para sa mga judges, siyam na hurado an pigkua gikan sa Metro Manila asin mayong kinua gikan sa Bicol Region tanganing magin fair asin malinig an resulta.
Katakod digde, puspusan naman an ensayo kan mga kandidata, nakapreparar na an tukawan para sa mga VIP asin madalan siringman piglalaoman an pag-abot kan mga mayor asin iba pang public officials.
Piglinaw man kan Councilor na libre an paglaog sa venue alagad igwa pa man giraray itatao na ticket tanganing magin smooth an maglaog.
Sa ngunyan, pigsierto na sana kan opisyal na mahigot an saindang ipapautob na seguridad para sa kasalbaduhan kan gabos na mga yaon sa venue.
