Pigsierto kan Bureau of Corrections (BuCor) na preparado na an saindang kulungan o pasilidad para ki dating Bamban Mayor Alice Guo asin iba pang indibidwal.
Sigun ki BuCor Director General Gregorio Pio P. Catapang Jr., mahigot an seguridad na pigpapautob sa Correctional Institution for Women (CIW), kun saen ibabalyo si Guo makalihis na hatulan nin reclusion perpetua kan Pasig Regional Trial Court huli sa qualified human trafficking.
Pigsaysay man ni CIW Corrections Technical Superintendent Marjorie Ann Sanidad na nagtalaga na sinda kan dugang na Corrections Emergency Response Team tanganing magtinir an katuninongan asin kaayusan sa laog kan pasilidad.
Naka-on-call status na man an gabos kan personahe ninda puon kasuudma.
Paliwanag ni Sanidad, komo parte kan standard operating procedure, pag-abot kan PDL na si Guo sa CIW aakuon ini kan sarong pigtalagang Receiving Officer sa Reception and Diagnostic Center (RDC).
Kabali sa enot na sa proseso an pag-verify kan saiyang mga dokumento asin kagamitan antes na isairarom sa limang aldaw na quarantine, kun saen isasagibo an masusing medical examination.
