Aram baya nindo mga ka-Bombo, sarong kumpanya sa Japan an nagkrear nin sarong teknolohiya na kayang magpalataw kan bilog na harong kun magtama an pagyugo-yugo.
Marurumdoman, na an Japan an nasa pacific ring of fire —sarong rehiyon sa palibot kan Pacific Ocean na aktibo sa mga linog asin pagputok kan bulkan siringman an apat na tectonic plates na nakapalibot sa nasyon (Pacific Plate, Philippine Sea Plate, Eurasian Plate, asin North American Plate).
Kun kaya siring na sana an kamawotan kan nasyon na makaimbento nin makabagong teknolohiya na kayang hampangon an dae mahulaang sakuna na siring kan pagyugo-yugo.
An proyekto pinangenotan kan imbentor na si Shoichi Sakamoto, na nakabiloga kan kakaibang seismic isolation system na kayang i-angat an bilog na harong kun nagyuyugo-yugo.
Sa oras kaya na mamatean an pagyugo-yugo, tulos na nagpapakawala nin compressed air sa irarom kan harong, na iyo mang nagtutulak digdi palangkaw nin hasta 3 sentimetro—bastante tanganing malikayan an labing pagyugo-yugo.
Sa laog sana kan kabangang segundo, malataw na an harong sa ere, asin saka ini paluway-luway na mababa sa daga kapag naghupa na an linog.
Dawa igwa nin pagirumdom an mga eksperto na posibleng porbaran kan mas makukusog asin multi-directional na linog an limitasyon kan imbensyon, nagtitinir na positibo an pananaw kan naggibo kaini.
Mientrastanto, presenteng pigbubusol an crowdfunding tanganing maipalaganap an floating house system bako sanang sa Japan, kundi sa iba pang parte kan kinaban.
