NAGA CITY- Nakapreparar an bastanteng numero kan mga food packs para sa posibleng panlalamasa kan La Niña sa dakulang parte kan nasyon.
Ini an pigsierto ni DSWD – Director of National Resource and Logistics Management Bureau (NRLMB) Leo Quintilla, kasabay kan pagsisierto sa padagos na nakapreparar kan ahenisya.
Sigun ki Quintilla, igwa na nin 1.54 milyong family food packs na naipreparar an ahensiya asin kadakol sa mga ini an naka-preposisyon sa manlaen-laen na mga field office.
Dakulang bultong kaini an nasa Bicol Region na igwa nin kabilugang 154,000 food packs mantang panduwa an CARAGA na igwa nin kapot na 144,000 family food packs.
Kadakol man soboot nin food packs an ipinadara kan DSWD sa mga field office kaini sa Northern Luzon asin magin sa Region 12. Sa presente, padagos-dagos man soboot an ginigibong pagrepake sa mga food packs.
Sigun ki Quintilla, pokus kan DSWD an mga lugar na piglalaoman na matatamaan kan mga makukusog asin dagos-dagos na pag-uran siring kan mga probinsya sa Sirangang parte kan nasyon, asin mga probinsya sa Visayas asin Mindanao.
