NAGA CITY- Nagpakol sa labi 2-K na pamilya an naapektaran kan nakalihis na Bagyong Uwan sa Bato, Camarines Sur.
Sa entrevista kan Bombo Radyo Naga ki Josephine Intia, Executive Assistant II, Bato, Camarines Sur, sinaysay kaini na nag-abot sa 2,646 households, 2,826 na affected families asin 9,417 katawo an naapektaran kan nasambitan ng raot kan panahon.
Sigun sa opisyal, an kadaklan sa mga naapektaran iyo an nasa lakeside Barangays partikular sa nasa Bacolod na binaha siringman sa Barangay Poblacion na nakaeskperyensiya nin makusog na duros.
Dugang pa kan opisyal, kadaklan sa mga harong na ini an gibo sa light materials kun kaya labing nadanyaran kan nasambitan ng raot kan panahon.
Katakod digde, tolos man na nagdestrebwer nin relief goods an lokal na gobierno kan Bato kun saen gabos na nag-ibakwar an natawanan kan nasambitan ng ayuda.
An mga ini an gikan soboot sa Provincial Government asin Regional Department kan DSWD na nag-abot sa nasa labi 4,000 food packs.
Siringman, pigsaysay man kan opisyal na dae man nadanyaran an saindang mga tinampo maski igwang binahang portion asin tolos na na-cleared man ini.
Mientrastanto, nag-abot man sa P2 million an inisyal na danyos sa agrikultura kun saen padagos na piglalapigutan kan lokal na gobierno kan Bato na makabuhat liwat an mga paraoma asin parasisira.
Sa ngunyan, pigsierto ni Intia na dagos-dagos an saindang pagtatao nin asistensiya sa saindang mga nasasakupan tanganing makatabang sa pangangaipuhan kan mga ini sa uru-aldaw makalihis an panlalamasa kan Bagyong Uwan.
