NAGA CITY- Nagpakol sa nasa labing 20 campaign poster an binaklas kan Comelec-Naga sa saindang pigkundusir na Operation Baklas sa pag-arangkada kan Campaign period para sa National post.
Sigun ki Atty Maico Julia Jr, Election Officer kan Comelec Naga, kadaklan kan saindang mga binaklas na poster an yaon sa mga poste kan kuryente, kahoy asin sa mga lugar na dae otorisadong bugtakan kan campaign posters na haros nasa mainroad.
Dugang pa kan opisyal, liwat na masagibo sinda nin pagbaklas sa maabot man na Marso 28 kasabay kan pagpuon kan kampanya para sa local position katabang giraray an mga magkakanigong opisina siring kan DENR, PNP asin iba pa.
Katakod kaini, pig-abisuhan man ni Julia an mga kandidato na kun mabugtak nin saindang campaign posters, ilaag ini sa mga designated areas siring kan bisinidad kan Barangay Hall, private residence basta igwang consent gikan sa may-sadiri siringman dae masobra sa 2ft-3ft.
Sa ibong na lado, pinagirumduman man kan opisyal an publiko na likayan na maibwelto sa Vote Buying asin Vote selling tanganing dae mabugtak sa alanganin na sitwasyon orog na ta igwang pig-aapod na warrantless arrest.
Sa ngunyan, piglalaoman ni Julia na sa pagpuon kan pag-arangkada kan kampanya sa local na position mapakol pa sa labi 50 campaign posters an babaklason na dae nagsusunod sa pigdesignar na lugar.
