NAGA CITY- Posibleng maapektaran an hasta sa 217,846 na ektarya kan mga omahan huli sa mga pag-uran asin mga pagbaha sa nagkapirang parte kan nasyon huli sa magkakasunod na Low Pressure Area, Soutwest Monsoon asin an duwang bagyo na kasuarin sana an naglaog sa teritoryo kan nasyon.
Ini an basado sa pagtaya kan Philippine Rice Information System, an kaenot-enoting satellite-based rice monitoring system sa Southeast Asia na ginagamit ngunyan sa Pilipinas.
An mga nasambitan ng omahan an gikan sa Bicol Region, CALABARZON, MIMAROPA, Western Visayas asin nagkapirang parte kan Mindanao.
Pigbibilog ini kan nasa 85,000 na ektarya kan mga paruyan na haros nasa reproductive stage pa sana asin 132,802 ektarya an nasa ripening stage. An natatadang labi 22,000 na ektarya kan mga omahan an natukoy na pwede nang anihon antes pa man an pagtama kan bagyo. Enot ng pigsierto kan Department of agriculture na nakabantay ini sa epekto asin piglilikayan na danyos kan mga magkakasunod na raot kan panahon.
Sigun sa DA, nakapreparar an mga punla nin paroy, mais, asin mga high value crops tanganing idestrebwer sa mga maapektarang paraoma, kaibahan na an mga bulong sa mga atamang hayop na posibleng mangaipuhan. Dagos-dagos man an PRIS sa pagluluwas nin mga bagong assessment asin updated report tanganing matawan nin giya an mga paraoma dapit sa mga kalamidad.
