NAGA CITY- Labi sa 300 na gaming outlets kan Philippine Charity Sweepstakes Office (PCSO) an naipasara sa Bicol.
Ini enkoneksyon sa kasuguan ni Presidente Rodrigo Duterte na ipasara an gabos na gaming scheme kan PCSO huli sa korapsyon.
Sa nakuang impormasyon kan Bombo Radyo Naga sa Police Regional Office (PRO5), napag-araman na an Camarines Sur an igwang pinakadakulang registered PCSO outlets na nasa 76.
Pigsusundan ini kan Albay na igwang 74, 49 sa Sorsogon, 44 sa Camarines Norte, 30 sa Catanduanes, 27 sa Naga City asin 22 man sa Masbate.
Sa entrevista ki NCPO Spokesperson Police Senior Master Sergeant Tobby Bongon, dawa nakasara na an nasambitan na mga gaming outlets alagad magpapadagos pa amn giraray an saindang monitoring hasta sa mga masurunod na aldaw.
Sa ibong na lado, ikinaogma man ni Naga City Mayor Nelson Legacion an nasambitan ng desisyon kan presidente urog na ta haloy na suboot nindang target an pagpapasara kan STL sa ciudad.
