Labi 37,000 na mga residentes kan Los Angeles, Calabasas, Malibu asin Pacific Palisades siring man sa Topanga Canyon sa Los Angeles County an pigsugo kan mga otoridad na mag-ebakwar huli sa padagos na wildfire.
Nakakurit na an mga otoridad duman nin duwang katawo na binawian nin buhay sa Eaton fire gikan sa Angeles National Forest na mahihiling sa Altadena area kan Los Angeles County asin Pasadena.
Sinaysay man ni county fire chief Anthony C. Marrone na importante na seryosohon kan mga residentes an evacuation order.
Pagsierto kaini na prayoridad ngunyan an buhay kaysa sa mga ari-arian.
Pig-enkaminar man kaini an mga residentes na magtipid sa paggamit kan tubig huli sa nawawaraan na nin laog an saindang fire hydrants.
Nasa labi 1,000 hektarya kan kadagaan an nasulo na asin labi 1,000 na man na mga establisyemento an natumpok kan nasambitan ng kasulo.
Pigsierto man ni US President Joe Biden an tabang gikan sa saiyang gobyerno asin pigsugo na kaini an mga bombero na magtarabangan para sa marekas na pagapundo kan kasulo.
