Labi sa 600 na personahes kan Philippine Coast Guard (PCG) Camarines Sur an nakatalaan na i-deploy para sa seguridad kan mga aktibidad kan Peñafrancia Festival, partikular na an pighahalat na marhay na Fluvial Procession.
Sa intrevista kan Bombo Radyo Naga ki LT. Kenny Villafuerte, PCG, Camarines Sur Station Commander, sinabi kaini na parte ini kan saindang preparasyon sa seguridad tanganing maseguro an kaligtasan kan mga deboto, residente, turista, asin iba pang nag-aatendir sa mga aktibidad na may kinaaraman sa taonan na selebrasyon.
Enot na tutukan kan coast guard personnel an mga lugar na sakop kan ruta kan Fluvial Procession, kabali na an mga parte kan mga salog asin iba pang agihan nin tubig kun saen mangyayari an aktibidad.
Magkakaigwa man nin surveillance sa mga sakayan pandagat asin mga tawo na masakay o mapartisipar sa prusisyon para tulos na masimbagan an anuman na insidente o emerhensya na posibleng mangyari durante kan aktibidad.
Kabali man sa mga lakdang sa seguridad an koordinasyon kan PCG sa iba pang ahensya nin gobyerno, lokal na gobyerno, asin mga ahensya kan ley tanganing maseguro an marahay na dalagan kan mga aktibidad asin mamantenir an seguridad sa mga lugar na piglalaoman na pano nin mga deboto asin bisita.
Segun ki Villafuerte, posibleng dagdagan pa an bilang kan mga personahes na ipapadara depende sa aktwal na pangangaipo sa operasyon asin an bilang kan mga piglalaoman na maatender sa mga mayor na aktibidad kan Peñafrancia Festival.
Apwera sa seguridad, preparado man an mga personahes kan Coast Guard na magresponde sa mga insidenteng may kinaaraman sa water safety, urog na ta piglalaoman na mas masibot an mga agihan nin tubig sa panahon kan Fluvial Procession.
Nangapudan an opisyal sa mga deboto asin iba pang partisipante sa aktibidad na magsunod sa mga safety protocols asin instruksyon kan mga awtoridad para maibitaran an anuman na aksidente. Partikularmenteng pinapagirumdom an mga sakayan pandagat asin mga pasahero na siguraduhon an saindang kaligtasan.
