NAGA CITY- Sibot na ngonyan an labi sa 1,000 na mga empleyado kan lokal na gobyerno kan ciudad nin Naga para sa gigibuhong cultural presentation competition sa saindang Christmas Party.
Sa entrevista kan Bombo Radyo Naga ki Anselmo Maño, presidente kan Naga City Local Government Unit Employees Alliance (NACILGUEA), sinaysay kaini na binanga sa limang grupo an 1,600 na mga empleyado kan City Hall para magralaban sa cultural presentation competition sa saindang Christmas Party sa Disyembre 14.
Makakaresibe suboot an manggagana nin P10,000 para sa first prize, P7,000 sa second prize asin P5,000 para man sa third prize.
Apwera sa nasambitang kompetisyon, maralaban man an 23 mga opisina sa City Hall sa pagarayunan nin Christmas decorations na igwang tema na ‘Christmas wonderland’.
Sigon ki Maño, saro sa mga criteria sa pagpili kan manggagana an ‘thriftiness’ sa ginamit na mga materyales sa Christmas decorations kaya kadaklan kan mga opisina naggamit nin recyclable materials sa mga dekorasyon.
Obheto suboot kan nasambitang mga aktibidad na mas mapapusog pa an ‘team work’ kan mga empleyado kan City Hall.
Mientrastanto, padagos an pagbulos kan mga tao sa Christmas village sa City Hall Compound, Plaza Quezon asin sa Plaza Quince Martires na igwang mga Disney-inspired decorations asin igwa nin manlaen-laeng kolor nin Christmas lights komo parte kan Kamundagan Festival 2018 sa ciudad.
Agaw atensyon man an dakulang Christmas tree sa Naga City People’s Hall asin an higanteng white Christmas tree sa Plaza Rizal.
