Pigbatikos ni House Assistant Minority Leader asin Gabriela Women’s Party Representative Arlene Brosas an dakulang paglangkaw sa parking fee kan Terminals 1, 2, asin 3 kan Ninoy Aquino International Airport o NAIA.
Dismayado si Brosas na kaka-take over pa sana kan San Miguel Corporation (SMC) sa operasyon kan NAIA asin mayo pa ining pagbabagong nangyayari alagad naenot nang naglupad an singil sa mga pasahero. Gikan sa dating 300 pesos an naglangkaw sa 1,200 pesos an overnight parking kan mga behikulo sa NAIA asin 480 pesos man sa motorsiklo. 50 pesos man an bayad sa premirong duwang oras na parking kan mga behikulo asin dugang na 25 pesos sa kada oras.
Sigun ki Brosas, kahirak kan mga empleyado sa NAIA na mapakol sa 225 pesos an bayad para sa walong oras kada aldaw na trabaho asin magabat man para sa mga pasaherong magbabakasyon nin pirang aldaw an magdamlag na singil sa parking.
Pagirumdom ni Brosas an NAIA sarong public infrastructure na obhetong magsirbi sa publiko asin dae tanganing gibuhon gatasan kan mga negosyante.
Huli digdi, plano kan Makabayan Bloc na magsunad nin resolusyon na mabusol nin imbestigasyon sa pagsasapribado kan NAIA kaakibat an pagpapautob kan bakong makatawong mga polisiya.
