Sinaysay ni Senate President Pro Tempore Panfilo Lacson na an testimonya ni dating Department of Public Works and Highways (DPWH) Secretary Manuel Bonoan an pwedeng magtao nin direktang implikasyon sa soboot pagkaka-imbwelto ni dating Executive Secretary Lucas Bersamin sa nagdadakulang flood control scandal kun enkaso magbweltada sa nasyon si Bonoan.
Sa sarong entrevista, ipinaliwanag ni Lacson na an mga alegasyon kontra ki Bersamina na presenteng nakabase sana sa “triple hearsay.”
Sigun sa saiya, an report na si Bersamin soboot an nagkapot kan P52 billion insertions an nakasaysay sana sa salaysay kan dating DPWH Undersecretary Roberto Bernardo, basado sa istorya ni dating DepEd Undersecretary Trygve Olaivar, na nagsabing nadangog kaini an pag-uulay ninda Bonoan asin Bersamin.
Pigtawan-duon ni Lacson na an sulamenteng makapagtatao nin direktang testimonya kontra ki Bersamin an si Bonoan sana.Si Bernardo an soboot nagkapot sa distribusyon kan P52 billion kickbacks gikan sa halos P100 billion fund insertions sa 2025 national budget basado sa naenot na in-expose ni Lacson.
Marurumduman na naghali na si Bonoan sa nasyon makalihis na magbutas sa DPWH mantang nag-iinit an isyu.
Nasa Estados Unidos ini ngunyan makalihis na mag-agi nin Taiwan, kaibahan an saiyang agom para sa medical procedure.
Aminado si Lacson na mayo pang direktang ebidensiya na nagkokonektar ki Bersamin sa anomalya.
Magin si Bersamin, dati nang pinahimutikan an anuman na pagkaka-imbwelto asin pighurot na an salaysay ni Bernardo an nakabase sa triple hearsay asin mayong kredibleng basehan.
Sa ibong kaini, nanindugan si Lacson sa pagsuporta sa mga pahayag ni Bernardo na nagsasabing si Bersamin soboot an “bahalang mag-asikaso” sa P52 billion insertions.
