NAGA CITY- Gadan an sarong lalaki makalihis badilon sa San Narciso, Quezon. Binisto an biktima na si Efren Magtibay Monterola, nasa legal na edad asin residente kan Brgy. Abuyon, sa nasambitan ng banwaan.
Sa nagunong impormasyon kan Bombo Radyo Naga sa Quezon Police Provincial Office, napag-araman na nangyari an pambabadil sa harayong parte kan Sitio Batud sa nasambitan ng barangay kun saen, digdi nagpasiring an biktima kaibanan an saiyang pasahero na binistong si Jenny Castillo Dela Cruz asin an aki kaini na si Edgar Monterola pasiring sa town proper (San Narciso, Quezon).
Pag-abot sa nasambitan ng lugar, bigla na sanang nag-abot an dae pa nabibistong suspek asin basang na sanang pinagbabadil an biktima sa manlaen-laen na parte kan saiyang lawas na nagin rason man kan tolos na pagkagadan ni Efren. Mientrastanto, tolos man nagdulag an suspek sa dae pa maaraman na deriksyon dara an ginamit na badil.
Sa ngunyan, nagpapadahos pa an imbestigasyon kan mga otoridad dapit sa nasambitan ng insidente.
