NAGA CITY- Nagsapo nin malalang lugad an sarong lalaki makalihis na tagaon kan saiyang kainuman sa Sitio Pag-Asa, Brgy. Salingogon, Minalabac, Camarines Sur.
Binisto an biktima na si Darwin, 41-anyos, residente kan Zone 5, Brgy. Balatas, Naga City.
Sa entrevista kan Bombo Radyo Naga ki PSSgt. Karen Callo, PCAD PNCO kan Minalabac Municipal Police Station, sinaysay kaini na dae man magkabisto an biktima asin an suspek na si Morrel, 34-anyos, residente kan Barangay Salingogon asin nagkaibahan sana sa inuman kan magkapikunan asin mauli sa mainit na diskusyon.
Digdi naman pigtaga ni Morrel si Darwin na pigtamaan sa likod kan saiyang payo.
Tolos man na pigdara sa ospital an biktima para sa asistensya medikal mantang tolos man na nagdulag an suspek pasiring sa dae pa maaraman na direksyon.
Sa ngunyan, nagpapadagos pa an pigsasagibong imbestigasyon kan mga otoridad dapit sa nasambitan ng insidente.
Pagirumdom na sana kan opisyal sa gabos na magin responsableng manginginom asin likayan man an pagdadrive enkaso nakainom na.
