Aram baya nindo mga ka-bombo, sarong joven na lalaki gikan sa Russia an pigdara sa ospital huli sa kidney failure makalihis na maggibo nin 2,000 squats tanganing manggana sa pustahan ninda kan saiyang amigo.
Susog sa report, an mga doktor sa nephrology department kan Vladivostok Clinical Hospital No. 2, sa Primorsky Krai, Russia kasuarin sana pigreport an dapit sa kakaibang kaso kan sarong lalaki na na-ospital huli sa malalang kamugtakan kan saiyang kidney na resulta kan physical overextension.
Pig-istorya soboot kan nasambitan ng lalaki sa mga doktor an saiyang namatean kun saen makalihis na manggana sa sarong pustahan sa paagi kan pag squats nin nasa 2,000 na beses nakamate na ini nin mga kakaibang sintomas.
An mga lapi kaini an namaga asin labi ang pagkulog, siringman nadipisilan na mag-urinate o mag-ihi. Huli sa labing pagkatakot, nagkonsulta ini sa doktor asin digde na na- diagnosed na igwa kan pig-aapod na rhabdomyolysis.
An Rhabdomyolysis an igwang potensyal na nakakagadan na medical condition na nagkakawsa tanganing an mga muscle tissue kan sarong tawo an mabari asin maglaog sa bloodstream.
Kun dae tolos maagapan, maresulta ini sa kidney failure, cardiac problems o kaya kagadanan.
Sa kaso kan lalaki, nagibuhan nin paagi kan mga doktor na marahay an saiyang pag-ihi maski dae nagsairarom sa dialysis alagad an danyos na pigkawsa kan rhabdomyolysis sa saiyang kidneys an mangangaipuhan nin bastanteng panahon tanganing marahay.
Sa ngunyan, kaipuhan na magsairarom kan lalaki sa rehabilitation treatment na madurar nin nasa tolong bulan o hasta taon.
