NAGA CITY- GADAN an sarong parasisira kan pagsasaksakon sa Infanta, Quezon.
Binisto an biktima na si Alyas Frederick, 42-anyos, residente kan Purok Maligaya, Barangay Dinahican sa nasambitan ng banwaan.
Sa nagunong impormasyon kan Bombo Radyo Naga sa Quezon Police Provincial Office, napag-araman na nagkaigwa nin mainit na diskusyon an biktima sa duwang suspek na binistong sinda alyas Rafael, 55-anyos, asin Custodio, 89-anyos, parehong residente kan nasambitan ng lugar.
Sa inisyal na imbestigasyon kan mga otoridad, napag-araman pa na mantang nagkakaigwa nin mainit na diskusyon, nagkua nin kutsilyo an biktima sa saiyang harong tanganing atakehon an mga suspek.
Digdi man, nangyari an agawan kan kutsilyo asin kan makua ini kan suspek, digdi naman kaini pinagsasaksak an biktima. Huli digdi, nagsapo nin lugad sa manlaen-laen na parte kan saiyang lawas an biktima na tolos man pigdara sa ospital an si Alyas Frederick para sa asistensya medikal alagad binawian man sana nin buhay.
Mientrastanto, nasa kustodiya naman kan mga otoridad an mga suspek para sa magkakanigong disposisyon, mantang narekober man sa mga ini an kutsilyo na ginamit sa insidente.
