Aram baya nindo mga ka-bombo, sarong motorista gikan sa France an pigsasabi na nagmaneho kan saiyang behikulo maski mayong lisensiya sa laog nin haros 28 taon.
Susog sa report, sa pigkundusir na routine traffic inspection kan mga otoridad sa Rhone, France saindang nakahampang an dae na pinangaran na motorista.
Makalihis na i-check an lisensiya kan plaka saindang napag-araman na expired na ini.
Apwera digde, kan i-check an dokumentos kan lalaki, napag-araman na mayo ining lisensiya huli ta pigbawi na palan kan mga otoridad kan taong 1997 pa.
Sigun sa lalaki, binawi an saiyang driver license kan taong 1997 makalihis na madakop na nagmamaneho mantang nasa impluwensiya nin arak.
Dae naman soboot nagpurbar na mag-aaply liwat an lalaki tanganing mabawi an nasambitan ng lisensiya.
Dugang pa kan kaini, nin huli ta mayo naman ining driver license dae naman soboot ini nagkua pa nin mandatory insurance o kaya isairarom sa technical inspections an saiyang lunadan.
Huli sa pangyayari, mahahampang man sa magkakanigong kapadusahan an nasambitan ng motorista.
Sa ngunyan, nagtitinir na dakulang kahaputan kun pano ini nakalusot sa mga otoridad sa halawig na panahon sa saiyang ginibong pagbalgar sa nag-iiral na batas trapiko sa lugar.
