Pigsierto ni Senate President Vicente “Tito” Sotto III kan nakalihis na Sabado, Disyembre 6 na dae tutugutan kan Senado an last-minute insertions sa proposed 2026 national budget.
Sa entrevista, kinumpirmar ni Sotto na nakatalaang aprubaran an badyet sa ikatulo asin huring pagbasa sa Martes, makalihis ining maipasa sa ikaduwang pagbasa kan Huwebes.
Dae na puwedeng may madagdag o mag-insert, dugang ni Sotto komo simbag sa pangamba kan publiko na pwedeng magporbar na naman an mga lehislador na ibalik an insertion sa bicam.
Pigsierto man na mayo nin “allocable” funds an nagtitinir sa proposed budget para sa discretionary use, apwera sa mga item na nasa irarom kan “unprogrammed appropriations,” na nakadepende sa revenue availability.
Marurumduman na binatikos ni Sotto an mga budget practice kan nakalihis na kun saen an pondo para sa programmed asin unprogrammed funds an pigriribay partikular sa badyet kan Department of Public Works and Highways (DPWH), na sinaysay kaining nagkakantidad nin “hundreds of billions.”
Sigun sa Senate President, pigpakarhay na ni Sen. Sherwin Gatchalian, chair kan Senate finance committee, an pagbubukas kan bicam sa Disyembre 10.
