Kinumpirma ng Senate Legislative Budget Research and Monitoring Office (LBRMO) na walang opisyal na dokumento na magpapatunay na si Senador Jinggoy Estrada ay nagsagawa ng insertions o amendments sa 2025 national budget.
Sa sulat ng LBRMO sa Office of the Ombudsman, nilinaw na ang lahat ng amendments na inaprubahan sa plenaryo ay itinuturing na aksyon ng buong Senado at hindi maaaring iugnay sa isang partikular na mambabatas.
Dagdag pa ng tanggapan, ang mga rekomendasyon o panukala mula sa mga opisina ng senador ay itinuturing lamang na internal working documents at hindi bahagi ng opisyal na legislative records.
Lumabas ang pahayag sa gitna ng isinasagawang imbestigasyon ng Ombudsman kaugnay ng alegasyon na nakatanggap umano si Estrada ng kickbacks mula sa mga flood control projects—isang paratang na mariin niyang itinanggi.
Sa kabila nito, nagpapatuloy ang imbestigasyon upang matukoy ang lawak ng umano’y anomalya at kung may pananagutan ang mga sangkot sa isyu.
