NAGA CITY- Mahigot ngonyan na binabantayan kan City Disaster Risk Reduction and Management Office (CDRRMO) an lebel kan tubig sa Naga River katakod kan namamatean na raot nin panahon.
Sa entrevista kan Bombo Radyo Naga ki CDRRMO head Ernie Elcamel, sinaysay kaini na nagtitinir na yaon pa sa normal an lebel kan tubig sa Naga River alagad binabantayan suboot ninda an posibleng pagtaas kaini urog na kun high tide sa parte kan San Miguel Bay.
Posibleng magkaigwa nin pagtaas kan lebel nin tubig sa mga barangay nin Triangulo, Mabolo asin Sabang kun maapaw an tubig hale sa Bicol river basin.
Mientrastanto, pigsierto man ngonyan ni Elcamel na nakaandam na an saiyang mga kabuhan siring man an mga Barangay Disaster Risk Reduction and Management Council (BDRRMC) para sa mas marikas na pagresponde sa anuman na problema.
