Nagbababa an level kan tubig sa mga irrigation canal, asin an mga basurang inaapon kan mga residente nagigin sagabal sa tuloy-tuloy na pagdaloy kan tubig paduman sa mga uma.
Sa intrevista kan Bombo Radyo Naga, sinabi ni Engr. Carol Rañola, Division Manager kan NIA-Camarines Sur, na halos kada aldaw an paglilinig asin desilting kan mga kanal tanganing dai magbara an dalagan kan tubig.
Segun sa saiya, problema man an nagbababang suplay kan tubig, kaya naghihimo an NIA nin mga intervention arog kan paggamit nin mga bomba tanganing madugangan an tubig sa mga lugar na dai naaabot kan irigasyon.
Idinugang ni Rañola na an basura sa mga kanal nakakaulang sa pagdaloy kan tubig, kaya hinahagad an kooperasyon kan mga residente sa tamang pagtatapon nin basura tanganing masiguro an suplay nin tubig sa mga uma.
