Sarong pagpapautob nin ley an pagpapa apon asin man pagkua ki dating Negros Oriental Rep. Arnulfo Teves Jr., sinaysay ni Assistant Secretary Erel Cabatbat kan Presidential Communication Office kan nakalihis na aldaw nin Biyernes.
Inihayag ni Cabatbat na nagpautob sana sinda nin ley asin ginibo sana an saindang tungkulin.
Kan hagadan man nin komento si Cabatbat dapit sa sinabi kan aki ni dating Cong. Teves na si Axl Teves na kinidnap an saiyang ama sa pagkua digde gikan sa Timor-Leste orog na ta mayo man nin extradition treaty an Pilipinas sa Timor-Leste, an nagin kasimbagan ni Cabatbat ay dae soboot ini privy sa nagin urulay, alagad pwedeng nakatabang an ginigibong pakikipagkoordinar ni Presidente Marcos sa Presidente asin Prime Minister kan Timor.
Sinabi ni Cabatbat na nirerespeto kaini an nagin pahayag kan aki ni dating Cong. Teves, na si Axl Teves nin huli ta an ginibo an sarong pagpapautob sana sa ley kan Pilipinas.
May mga arrest warrants soboot na iniluwas asin man kaipuhan na ipautob ini.
Sa ibong na banda, sinabi pa kaini na nakabantay aain nakaantabay si Presidente Ferdinand Marcos Jr. sa development sa pagkua sa puganteng si dating Negros Oriental Representative Arnulfo Teves gikan Timor-Leste.
Marurumdumang nagpasiring sa Timor-Leste si Teves makalihis ining itukdong mastermind sa paggadan ki dating Negros Oriental Governor Roel Degamo kan nakalihis na Marso 2023.
Sigun pa ki Cabatbat, kaiba sa extraction team, antes pa sinda magpasiring Timor-Leste ay ‘namo-monitor asin napapaaram’ na ki Presidente Marcos an mga nangyayari.
Dugang pa ni Cabatbat na komo kasimbagan soboot sa sugo ni Presidente Marcos ay maayos, mapayapa asin matrayumpo na nauli sa Pilipinas si Teves.
