NAGA CITY- Kamawotan kan lokal na gobierno kan siyudad nin Naga na malikayan na igwang maputukan o madanyaran an buhay sa pagselebrar kan kapaskuhan asin bagong taon
Sa nagin patara-tara ni Renne Gumba, Director kan Public Safety Office Naga, sinaysay kaini na intensyon kan saindang gigubuhon na pagbabantay ngunyan na kapaskuhan asin Bagong taon an malikayan na igwang makulugan, maputukan o kaya madanyaran an saindang buhay.
Huli kaini, hagad kan opisyal an pagtatarabangan, kooperasyon kan lambang saro orog na an pagsunod sa piglatag na panundunan tanganing magin maogma sana an pagselebrar kan nasambitan ng kasiributan.
Sigun pa ki Gumba, dapat aram kan mga tawo kun ano an mga ipinagbabawal, mga lugar na designated sana para sa pagpapaputok tanganing makasunod sa mga piglatag na panundunan.
Dugang pa kan opisyal, kaipuhan man an pagigin responsable kan lambang saro komo mga lakdang sa matuninong na pagselebrar kan pasko.
Sa ngunyan, hagad na sana kaini na maabot kan LGU-Naga an kamawotan para sa salbado asin maogmang pagselebrar kan Christmas asin New Year.
