NAGA CITY- Natapos na an lokal na gobierno kan Naga sa distribusyon kan relief packs sa haros gabos na residentes sa siyudad nin Naga na naapektaran kan Bagyong Kristine.
Sa nagin paghampang sa mga kagawad kan media ni Naga City Mayor Nelson Legacion, sinaysay kaini na dapat an gabos na mga residentes an natawan na magin an mga borders o temporary residents kan siyudad.
Paliwang kan opisyal, nagkaigwa soboot nin duwang round kan pagdestrebwer nin relief packs, sa enot na round nakapagtao nin nasa poco mas o menos 70,000 food packs mantang para man sa second round nakapagdestrebwer nin nasa 13,000.
Katakod kaini, nagpakol sa nasa labi 80,00 food packs an naitao sa pangkabilugan na kun saen an 35,000 digde an gikan sa DSWD mantang an 45,000 an pig-alokar kan LGU.
Sigun sa alkalde an populasyon kan siyudad an nagpakol sa nasa labi 200-K kun kaya naglalaom ini na natawan an gabos orog na ta saindang pigkatiwala an distribusyon sa mga barangay.
Alagad, pig-ako man ni Legacion na igwang mga problema sa distribusyon nin huli ta igwa soboot nagpapa-abot nin sumbong sa sainda man na opisina.
Sa ngunyan, hagad na sana kan opisyal sa gabos na dae pagpairalon an pagigin makasadiri sa panahon kan kalamidad asin padanayon an pagkakasararo.
