NAGA CITY- Nagpapadagos an pagbilog nin mga lakdang kan LGU-Naga tanganing masimbagan an problema sa pagbaha sa siyudad.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na nagkonsulta na sinda sa mga specialist sa flood control tanganing matabangan an siyudad na ma-predict kun hasta saen an tubig tuying nagkakaigwa nin pagbaha, pagkakaigwa nin early warning system asin iba pa.
Sigun ki Robredo, importante soboot an nasambitan ng lkdang tanganing mabawasan an problema asin malikayan an orog pang paglala kan sitwasyon.
Katakod digde, riripasuhon man kan gobierno lokal an mga nakatindog na harong asin establishmento na sakop kan Sagop creek orog na ta kaipuhan na magkaigwa nin rehabilistasyon digde.
Kaipuhan soboot na mag-isog kan mga nakaulang sa gigubuhong rehabilitasyon tanganing dae balik-balik an problema.
Katakod digde, sususugon kan LGU-Naga an mga building permit tanganing maisagibo an nasambitan ng plano.
Mienrastanto, nagpapadagos man an pigsasagibong declogging sa siyudad nin Naga tanganing makatabang pa sa paglikay sa pagbaha.
Sigun sa alkalde, kadakol nakakalkal na mga basura sa mga drainage na haros pirang taon nang nakaulang sa nasambitan ng drainage system.
Sa ngunyan, pigsierto na sana ni Robredo na padagos an saindang paglalapigot tanganing magkaigwa nin komprehensibong pagsimbag sa problema.
