NAGA CITY- Padagos an lokal na gobierno kan siyudad nin Naga sa pagbilog nin mga lakdang tanganing masimbagan an problema sa pagbaha.
Marurumduman, haloy nang huma sa mga Nagueño an pagbaha tuyong nagbubulos an makusog na pag-uran sa siyudad. An nasambitan ng problema an mawot wakasan kan presenteng administrasyon.
Katakod digde, ngunyan na 2025, pupuonan an pagdidisenyo kan sadiring Early Warning System kan siyudad sa tabang kan Idea2Startup+Bloomberg Challenge.
Nagtutubod si Naga City Mayor Leni Robredo na sa paagi kaini asin kun pagtatarabangan, kayang-kayang masolusyunan.
Katakod kaini, uya an mga pwedeng magbali: Mga estudyante, Faculty, Professional, Enterprise, o Innovators na gikan sa Metro Naga (Ocampo, Pili, Bula, Naga City, Camaligan, Gainza, Canaman, Magarao, Bombon, Calabanga, Milaor, Minalabac, San Fernando, Pamplona, Pasacao, asin Libmanan).
An mga kategorya man na pwedeng balihan an mga minasunod: Typhoon and Flood Warning Systems, River Watershed Monitoring Solutions asin Flood Warning Public Address Systems. Mientrastanto, an deadline kan aplikasyon an sa maabot na August 7, 2025 alas 5 nin hapon.
Sa ngunyan, yaon an kahagadan kan alkalde sa mga Nagueño na makisumaro sa saindang mga programa tanganing malabanan an pagbaha asin magtinir na salbado an gabos sa panahon kan kalamidad.
