Pigtawan duon kan alkalde kan siyudad nin Naga na padagos an saindang paglalapigot na masimbagan an problema sa pagbabaha.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na igwang naka-iskedyul sa paglinig kan mga kanal asin iba pang mga waterways sa siyudad komo paagi tanganing malikayan an pagbara kan mga basura na makawsa man sa paglangkaw nin tubig.
Sigun pa sa opisyal, sa may parte kan Barangay Del rosario dae pa madetermina kun makakalaog an excavator alagad enkaso dae, kaipuhan na imano-mano na sana ini.
Dugang pa kan alkalde, huli sa pigkundusir na fluvial procession kaya naibalyo an excavator sa Naga river kun kaya eenoton paramientras an Rotonda sa may Concepcion ta ini halipot sana asin isusunod na an yaon sa may parte kan Penafrancia River sa may Del Rosario.
Mientrastanto, pigsaysay pa ni Robredo na labi an siltation sa may parte kan sarong mall sa siyudad nin kun kaya nagkakaigwa nin debate dapit digde huli ta kamawotan kan CEO an inaapod na open canal orog na ta pigkakahaditan na pirme sana ining mapapano kan mga basura.
Katakod digde, pigsierto man kan opisyal na basta salbado an pigsuhestyon asin makakatabang ini sa pagresolbar kan pagbaha bukas soboot na saindang lado na ikonsederar ini.
Pigheras man ni Robredo nag-request sinda nin gamit sa DILG tanganing maipadagos an pagpapakarhay kan mga imprastraktura sa siyudad.
Sa ngunyan, hagad na sana liwat kan alkalde an kooperasyon kan publiko tanganing magin matrayumpo an saindang pigbibilog na mga lakdang kontra sa pagbaha.
